Sertralin WH - Filmuhúðuð tafla

Sertralin WH inniheldur virka efnið sertralín. Sertralín tilheyrir flokki lyfja sem kallast sérhæfðir
serótónínendurupptökuhemlar (SSRI-lyf); þessi lyf eru notuð til meðferðar við þunglyndi og/eða
kvíðaröskunum.

Sertralin WH er notað við meðferð á:
• Þunglyndi og til að fyrirbyggja endurkomu þunglyndis (hjá fullorðnum).
• Félagslegri kvíðaröskun (hjá fullorðnum).
• Áfallastreituröskun (PTSD) (hjá fullorðnum).
• Felmtursröskun (ofsahræðsla) (hjá fullorðnum).
• Þráhyggju-árátturöskun (hjá fullorðnum, börnum og unglingum á aldrinum 6-17 ára).

Þunglyndi er sjúkdómur sem lýsir sér með einkennum eins og depurð, erfiðleikum með svefn og með
að njóta lífsins eins og áður.

Þráhyggju-árátturöskun og felmtursröskun eru sjúkdómar sem tengjast kvíða, með einkennum eins og
að vera stöðugt áreittur af þrálátum hugsunum (þráhyggja) sem láta þig endurtaka ákveðnar athafnir
(árátta).

Áfallastreituröskun er ástand sem getur komið í kjölfar erfiðrar andlegrar lífsreynslu og hefur sum
einkenni sem svipar til þunglyndis og kvíða. Félagsleg kvíðaröskun (félagsfælni) er sjúkdómur sem
tengist kvíða. Hún einkennist af miklum kvíða eða vanlíðan við félagslegar aðstæður (t.d. við að tala
við ókunnugt fólk, tala fyrir framan stóran hóp fólks, borða eða drekka fyrir framan aðra eða hafa
áhyggjur af því að verða sér til skammar).

Læknirinn hefur ákveðið að lyfið henti til meðferðar við sjúkdómnum þínum.

Þú skalt spyrja lækninn ef þú ert ekki viss um hvers vegna þér var ávísað Sertralin WH.