Methylphenidate Medical Valley - Forðatafla

Við hverju Methylphenidate Medical Valley er notað

Methylphenidate Medical Valley er notað til meðferðar við athyglisbresti með ofvirkni (ADHD):
• Það er notað hjá börnum 6 ára og eldri og fullorðnum.
• Það er aðeins notað eftir að meðferðir án lyfja hafa verið reyndar, t.d ráðgjöf og atferlismeðferð.
Ekki má nota Methylphenidate Medical Valley til að meðhöndla athyglisbrest með ofvirkni hjá
börnum yngri en 6 ára.

Hvernig Methylphenidate Medical Valley verkar

Methylphenidate Medical Valley bætir virkni ákveðinna hluta heilans sem eru vanvirkir. Lyfið getur
hjálpað til við að bæta athygli, einbeitingu og draga úr hvatvísi.

Lyfið er notað sem þáttur í meðferðaráætlun sem felst venjulega í:
• sálfræðilegri meðferð
• fræðslu
• félagslegri meðferð.
Einungis læknar sem hafa reynslu af hegðunarvandamálum hjá börnum, unglingum eða fullorðnum
ávísa lyfinu. Ef þú ert fullorðin(n) og hefur ekki fengið meðferð áður gerir sérfræðingurinn próf til að
staðfesta að þú hafir verið með athyglisbrest með ofvirkni frá barnsaldri. Þó að ekki sé til lækning við
athyglisbresti með ofvirkni er hægt að ná tökum á honum með meðferðarúrræðum.

Um athyglisbrest með ofvirkni (ADHD)

Börnum og unglingum með athyglisbrest með ofvirkni finnst erfitt:
• að sitja kyrr
• að einbeita sér.
Þau geta ekki gert að því að eiga erfitt með þetta.

Mörg börn og unglingar eiga í vandræðum með að vera kyrr og einbeita sér. Þegar um athyglisbrest
með ofvirkni er að ræða getur þetta þó valdið vandamálum í hversdagslífinu. Börn og unglingar með
athyglisbrest með ofvirkni geta átt erfitt með að læra og vinna heimavinnuna sína. Þeim finnst erfitt að
haga sér vel heima, í skólanum og annars staðar.
Fullorðnum með athyglisbrest með ofvirkni finnst oft erfitt að einbeita sér. Þeir finna oft fyrir
eirðarleysi, óþolinmæði og eftirtektarleysi. Þeim getur þótt erfitt að skipuleggja einkalíf og vinnu.

Ekki þarf að meðhöndla alla sjúklinga sem eru með athyglisbrest með ofvirkni með lyfi.
Athyglisbrestur með ofvirkni hefur ekki áhrif á greind.

Verið getur að læknirinn hafi ávísað lyfinu við öðrum sjúkdómi eða í öðrum skömmtum en tiltekið er í
þessum fylgiseðli. Ávallt skal fylgja fyrirmælum læknis og leiðbeiningum á merkimiða frá lyfjabúð.