Amoxicillin Sandoz - Mixtúruduft, dreifa

Amoxicillin Sandoz inniheldur
- Virka innihaldsefnið er amoxicillin (sem trihýdrat).
5 ml af fullbúinni mixtúru, dreifu innihalda amoxicillintrihydrat sem samsvarar 500 mg af
amoxicillini.
- Önnur innihaldsefni eru: vatnsfrí sítrónusýra (E 330), natríumbensóat (E 211), aspartam
(E 951), talkúm (E 553b), vatnsfrítt þrínatríumsítrat (E 331), guar (E 412), kísiltvíoxíð (E 551),
sítrónubragðefni, duft (inniheldur m.a.: sorbitól, brennisteinsdíoxíð, glúkósa),
ferskju/apríkósubragðefni, duft (inniheldur m.a.: sorbitól, brennisteinsdíoxíð, bensýlbensóat),

appelsínubragðefni, duft (inniheldur m.a.: bensýlalkóhól).

Lýsing á útliti Amoxicillin Sandoz og pakkningastærðir
Hvítt til ljósgult duft með einkennandi ávaxtalykt.

Brún glerglös sem innihalda 12 g af dufti fyrir 60 ml mixtúru, dreifu eða 20 g af dufti fyrir 100 ml
mixtúru, dreifu, með barnaöryggisloki úr polypropyleni (þrýsta + snúa) og innsiglishimnu.
Mæliskeiðin sem fylgir er merkt við 1,25 ml, 2,5 ml og 5,0 ml og er gerð úr polypropyleni.

Stakar pakkningar: 60 ml og 100 ml glös í pappaöskju.
Sjúkrahúspakkningar: 10x60 ml, 20x60 ml og 40x60 ml, 10x100 ml og 40x100 ml, glös í pappaöskju.

Ekki er víst að allar pakkningastærðir séu markaðssettar.

Markaðsleyfishafi og framleiðandi
Markaðsleyfishafi
Sandoz A/S, Edvard Thomsens Vej 14, 2300 Kaupmannahöfn S, Danmörk

Framleiðandi
Sandoz GmbH, Biochemiestrasse 10, A-6250 Kundl, Austurríki

Þessi fylgiseðill var síðast uppfærður í apríl 2023.

Almennar ráðleggingar varðandi notkun sýklalyfja

Sýklalyf eru notuð til meðferðar við sýkingum af völdum baktería. Þau hafa engin áhrif á sýkingar
af völdum veira.

Stundum svarar sýking af völdum baktería ekki meðferð með sýklalyfi. Ein algengasta ástæðan fyrir
því að þetta gerist er sú að bakterían sem veldur sýkingunni er ónæm fyrir sýklalyfinu sem notað er.
Þetta þýðir að bakteríurnar halda áfram að lifa og geta jafnvel fjölgað sér þrátt fyrir sýklalyfið.

Margar ástæður eru fyrir því að bakteríur geta orðið ónæmar fyrir sýklalyfjum. Varkárni við notkun
sýklalyfja getur hjálpað til við að draga úr líkunum á því að bakteríur verði ónæmar fyrir þeim.

Þegar læknirinn ávísar meðferð með sýklalyfi er það eingöngu gert til þess að meðhöndla þau
veikindi sem hrjá þig á þeim tíma. Ef eftirfarandi ráðleggingum er fylgt mun það hjálpa til við að
koma í veg fyrir myndun ónæmra baktería sem geta valdið því að sýklalyfið hætti að virka.

1- Mjög mikilvægt er að þú takir sýklalyfið í réttum skammti, á réttum tíma og í réttan dagafjölda.
Lestu leiðbeiningarnar á merkimiðanum og ef þú skilur ekki eitthvað skaltu biðja lækninn eða
lyfjafræðing um að útskýra.
2- Þú skalt ekki taka sýklalyf nema að því hafi verið ávísað sérstaklega fyrir þig og þú skalt
eingöngu nota það til meðhöndlunar á þeirri sýkingu sem því var ávísað við.
3- Þú skalt ekki taka sýklalyf sem hefur verið ávísað fyrir aðra, jafnvel þótt þeir hafi verið með
sýkingu sem var svipuð þinni.
4- Þú skalt ekki gefa öðru fólki sýklalyf sem var ávísað fyrir þig.
5- Ef eitthvað er eftir af sýklalyfinu þegar meðferðinni sem læknirinn ráðlagði er lokið, skaltu fara
með afganginn í apótekið til förgunar á viðeigandi hátt.


Leiðbeiningar fyrir blöndun
Mixtúran er blönduð í apóteki.
Eftir að skrúflokið er opnað skal ganga úr skugga um að innsiglið sé óskaddað og vel fast við brún
glassins. Ekki nota ef innsiglið er skaddað. Hristið glasið vel til að losa um duftið.
Til að blanda dreifuna á að fylla glasið með fersku kranavatni að u.þ.b. 1 cm fyrir neðan
áfyllingarmarkið, loka og hrista strax vel.

Eftir að froðan hefur sest á að bæta hægt við því magni af fersku kranavatni sem vantar að
áfyllingarmarkinu (51 ml vatn fyrir 60 ml, 85 ml vatn fyrir 100 ml dreifuna).

Hristið aftur kröftuglega.
Hvíta til ljósgulleita dreifan með ávaxtalykt er nú tilbúin til notkunar.
Ekki skal nota dreifuna eftir blöndun ef hún er ekki hvít til ljósgulleit á litinn.
Hristið glasið vel fyrir hvern skammt.